ԿԱՅՔԻ ՔԱՐՏԵԶ
ԹԵԺ ԳԻԾ
20.11.2014 18:58
Խորհրդակցություն ԼՂՀ ոստիկանության պետի մոտ
Սույն թվականի նոյեմբերի 20-ին ԼՂՀ ոստիկանության պետ, գեներալ-մայոր Կամո Աղաջանյանը խորհրդակցություն անցկացրեց ճանապարհային ոստիկանության անձնակազմի հետ։
Մանրամասն վերլուծելով ճանապարհապարեկային ծառայության գործունեությունը` ոստիկանության պետը պահանջեց արդար և սկզբունքային գտնվել քաղաքացիների հանդեպ։
«Երթևեկության կանոնների խախտում կատարած անձին սկզբից զգուշացրեք ու նոր միայն, խախտումը կրկնվելու դեպքում, ենթարկեք տուգանքի։ Ես ձեզանից չեմ պահանջել ու երբևէ չեմ էլ պահանջելու վարչական տույժի ենթարկել մեր համերկրացիներին: Տույժի կիրառումը արդարացված կարող է լինել միայն ամենածայրահեղ դեպքում, երբ նկատում եք, որ տրանսպորտային միջոց վարող վարորդը քամահրական վերաբերմունք է դրսևորում երթևեկության կանոնների նկատմամբ և իրական վտանգ է ստեղծում ոչ միայն իր կյանքի ու առողջության, այլև երթևեկության մասնակիցների համար: Մնացած բոլոր դեպքերում բացատրեք, պարզաբանեք և օգնեք քաղաքացիներին` հատուկ վերաբերմունքի արժանացնելով տարեց վարորդներին և զինծառայողներին։ Միայն օրենքի առաջ հավասարության սկզբունքի անշեղ ապահովմամբ և ժողովրդին անձնվեր ծառայելով կարող ենք հասնել հասարակության լիարժեք վստահությանը» - եզրափակեց ոստիկանության պետը։