ԿԱՅՔԻ ՔԱՐՏԵԶ
ԹԵԺ ԳԻԾ
25.10.2018 15:14
Անաչառությամբ և սկզբունքայնությամբ ապահովել երթևեկության մասնակիցների կյանքն ու առողջությունը. ԱՀ ոստիկանության պետը ամփոփեց ճանապարհային ոստիկանության ընթացիկ տարվա 9 ամսվա արդյունքները
Սույն թվականի հոկտեմբերի 24-ին Արցախի Հանրապետության ոստիկանության պետ¸ ոստիկանության գնդապետ Իգոր Գրիգորյանը այցելեց ճանապարհային ոստիկանություն և ամփոփեց ընթացիկ տարվա 9 ամսվա արդյունքները:
Խորհրդակցությանը մասնակցում էր ճանապարհային ոստիկանության գործունեության վերահսկման պատասխանատու, ԱՀ ոստիկանության պետի տեղակալ, ոստիկանության գնդապետ Գագիկ Ղահրամանյանը:
Հիմնական զեկույցը ներկայացրեց ԱՀ ոստիկանության ճանապարհային ոստիկանության պետ, ոստիկանության փոխգնդապետ Իգոր Օհանյանը:
Հաշվետու ժամանակաշրջանում հանրապետության տարածքում գրանցվել է 58 ճանապարհատրանսպորտային պատահար, որոնց հետևանքով զոհվել է 11 և վիրավորվել` 62 մարդ, նախորդ տարվա նույն ժամանակահատվածի 56 պատահարի, 8 զոհի և 63 վիրավորի համեմատությամբ:
Նախորդ տարվա համեմատ հանրապետության տարածքում ճանապարհատրանսպորտային պատահարների թիվը աճել է 2-ով, զոհերի քանակը՝ 3-ով, իսկ վիրավորների թիվը նվազել՝ 1-ով:
ԱՀ ոստիկանության պետը ըստ շրջանների վերլուծելով գրանցված ճանապարհատրանսպորտային պատահարների պատճառահետևանքները, դրանց կանխարգելման ուղղությամբ հստակ հանձնարարականներ տվեց պատասխանատուներին:
«Ձեր անաչառությամբ և սկզբունքայնությամբ է պայմանավորված երթևեկության մասնակիցների կյանքն ու առողջությունը: Պահանջում եմ անզիջում լինել հատկապես անսթափ վիճակում, առանց վարորդական իրավունքի և արագության գերազանցմամբ տրանսպորտային միջոցներ վարողների նկատմամբ՝ «Արջի ծառայություն» չմատուցել և չդառնալ ողբերգության անուղղակի պատճառ» -նշեց ոստիկանության պետը:
Ծառայության արդյունավետության բարձրացման ուղղությամբ տրված հանձնարարականների շրջանակներում, ոստիկանության պետը պատասխանատուների ուշադրությունը հրավիրեց նաև ճանապարհային ոստիկանության ծառայողների պատշաճ արտաքին տեսքի պահպանման և տրանսպորտային միջոցների սարքինության պահանջների ապահովմանը: