ԿԱՅՔԻ ՔԱՐՏԵԶ
ԹԵԺ ԳԻԾ
11.08.2014 18:03
Պետական պարգևներ ԼՂՀ Նախագահի կողմից
Սույն թվականի օգոստոսի 11-ին ԼՂՀ ոստիկանությունում տեղի ունեցավ հանդիսավոր արարողակարգ: ԼՂՀ Նախագահ Բակո Սահակյանի սույն թվականի օգոստոսի 8-ի հրամանագրով ոստիկանության երկու ծառայողներ արժանացել էին պետական պարգևների, որոնք անձամբ ոստիկաններին հանձնեց ԼՂՀ ոստիկանության պետ, գեներալ-մայոր Կամո Աղաջանյանը:
ԼՂՀ պետական սահմանը ապօրինի հատած ադրբեջանցի դիվերսանտների հայտնաբերման ու ձերբակալման գործում ցուցաբերած անձնական խիզախության և կյանքին սպառնացող վտանգի պայմաններում ծառայողական պարտքը պատշաճ կատարելու համար ԼՂՀ ԿԱ ոստիկանության Շահումյանի շրջանային բաժնի հերթապահի օգնական, ոստիկանության սերժանտ Ռոբերտ Հայկի Ադիբեկյանը և ոստիկանության քրեակատարողական տեսչության Շահումյանի շրջանի տեսուչ, ներքին ծառայության ավագ լեյտենանտ Էրիկ Գարիկի Գրիգորյանը ԼՂՀ Նախագահի հրամանագրով պարգևատրվեցին «Արիության համար» մեդալով:
Ոստիկանության մի շարք ծառայողներ արժանացան դրամական պարգևների:
ԼՂՀ ոստիկանության պետը, շնորհավորելով պարգևատրվածներին, համոզմունք հայտնեց, որ նրանց անձնվեր օրինակը կոգևորի բոլորին ու յուրաքանչյուր ոստիկան այսուհետ ավելի պատասխանատվությամբ և նվիրումով կլծվի ոչ միայն գործառնական պարտականությունների անթերի իրականացմանը, այլև պետության պաշտպանության և հայրենիքին սպառնացող վտանգը չեզոքացնելու սուրբ գործին:
«Մեր ժողովրդի, պաշտպանության բանակի և իրավապահ մարմինների միահամուռ ուժերով մեզ հաջողվեց վնասազերծել հակառակորդի դիվերսանտներին: Ի տարբերություն մեր հարևանների` դիվերսանտներն իրենց պատասխանատվությունը և պատիժը կկրեն ԼՂՀ օրենսդրությամբ սահմանված դրույթներով: Ես այսօր ձեր առջև խնդիր եմ դնում բոլոր ուժերն ու միջոցները ներդնել մեր սահման ներթափանցող հակառակորդին ժամանակին հայտնաբերելու և վնասազերծելու համար: Միմիայն մեր զգոնության և խիզախության շնորհիվ կարող ենք ապահովել մեր ժողովրդի անվտանգությունը և նրա խաղաղ, ստեղծարար առաջընթացը»,- եզրափակեց ԼՂՀ ոստիկանության պետը: