ԿԱՅՔԻ ՔԱՐՏԵԶ
ԹԵԺ ԳԻԾ
09.05.2014 08:49
Շնորհավորական ուղերձ եռատոնի առթիվ
ԼՂՀ ոստիկանության պետ, գեներալ-մայոր Կամո Աղաջանյանի շնորհավորական ուղերձը Հաղթանակի տոնի, Լեռնային Ղարաբաղի Հանրապետության պաշտպանության բանակի և Շուշիի ազատագրման օրվա կապակցությամբ.
Սիրելի ազգակիցներ, Հայրենական Մեծ պատերազմի և Արցախյան ազատամարտի վետերաններ, մայիսի 9-ը յուրօրինակ խորհուրդ է պարունակում իր մեջ: Ֆաշիզմի դեմ պայքարում ազատատենչ մյուս ազգերի հետ միասին մեր ժողովուրդը չերկմտեց մաքառել չարի դեմ և հաղթանակով հասավ մինչև Բեռլին:
20-րդ դարի վերջին սեփական հողում ազատ ապրելու ձգտմանն ի պատասխան թշնամին ներխուժեց մեր երկիր, սակայն, ազգովին համախմբվելով, մենք կարողացանք փառքով պսակել մեր պայքարը:
Պաշտպանության բանակի կազմավորումը օրախնդիր հրամայական էր, որով թևակոխեցինք իրադարձությունների մի նոր շրջան:
Շուշիի ազատագրումը մեր ժողովրդի անսասան հավատի փայլուն օրինակն էր, որով ապացուցեցինք աշխարհին, որ հայը անհաղթելի է իր միասնականության մեջ:
Հաղթանակները հենց այնպես չեն տրվում: Ցավոք, մեր ազգի լավագույն սերուցքը այդպես էլ չտեսավ ազատագրված հայրենիքը:
Շնորհավորելով Հայրենական Մեծ պատերազմում տարած հաղթանակի, Պաշտպանության բանակի կազմավորման եւ Շուշիի ազատագրման առթիվ, հավաստիացնում եմ, որ ինչպես Արցախյան ազատամարտի տարիներին, այսօր էլ ոստիկանությունը կանգնած է պետության և ժողովրդի կողքին:
Սիրելի հայրենակիցներ, մենք ընտրել ենք ճիշտ ճանապարհ և արդար ուղի, իսկ արդարությունը աստվածահաճո գործ է:
Եվս մեկ անգամ շնորհավորելով եռատոնի կապակցությամբ, մեր ժողովրդին մաղթում եմ ուժ, կորով, խաղաղություն և անձնական երջանկություն: