ԿԱՅՔԻ ՔԱՐՏԵԶ
ԹԵԺ ԳԻԾ
01.12.2015 16:16
Շնորհավոր տոնդ, իրավակարգի զինվոր
Նոյեմբերի 30-ին նշվեց Արցախի Հանրապետության ոստիկանության ծառայողի մասնագիտական օրը:
Ոստիկաններին շնորհավորելու էր եկել Արցախի Հանրապետության Նախագահ Բակո Սահակյանը:
Տոնական արարողությունը սկսվեց հանդիսավոր տողանով:
Մասնագիտական տոնի առթիվ ոստիկաններին շնորհավորելու էին եկել Արցախի Հանրապետության պետական այրեր, ոստիկանության վետերաններ և ՀՀ ոստիկանության պատվիրակությունը:
Արցախի ազատամարտում նահատակված ոստիկանների հիշատակը հավերժացնող՝ ոստիկանության բակում վեր խոյացող հուշաքարին հարգանքի տուրք մատուցելուց հետո ոստիկանության դահլիճում մեկնարկեց հանդիսավոր ժողովը:
Ելույթով հանդես եկավ Արցախի Հանրապետության ոստիկանության պետ, գեներալ-մայոր Կամո Աղաջանյանը:
Ոստիկաններին ուղղված շնորհավորական ուղերձով հանդես եկավ Նախագահ Բակո Սահակյանը:
Նախագահի հրամանագրերով՝ ոստիկանության պետ, գեներալ-մայոր Կամո Աղաջանյանը պարգևատրվեց «Մխիթար Գոշ» մեդալով, ոստիկանության 4 ծառայող և 1 վետերան պարգևատրվեցին «Մարտական ծառայություն» մեդալով, իսկ ոստիկանության փոխգնդապետներ Գրիգորի Աբրահամյանին և Գեղամ Գաբրիելյանին շնորհվեցին գնդապետի հերթական կոչումներ:
ՀՀ ոստիկանության պետ, գեներալ-լեյտենանտ Վլադիմիր Գասպարյանի շնորհավորական ուղերձը հրապարակեց ՀՀ ոստիկանության պետի տեղակալ, ոստիկանության գեներալ-մայոր Գագիկ Համբարձումյանը:
Վլադիմիր Գասպարյանի հրամանով՝ Կամո Աղաջանյանը պարգևատրվեց «Մարտական զորակցություն» մեդալով և հուշանվերով: «Համագործակցության ամրապնդման համար», «Իրավակարգի ամրապնդման համար» և «Օրենքի պատվար» մեդալներով պարգևատրվեցին ոստիկանության 8 ծառայող, իսկ 4 ծառայող արժանացավ «Ոստիկանությունում գերազանց ծառայության համար» կրծքանշանի:
Հրապարակվեցին նաև Արցախի Հանրապետության պաշտպանության նախարարի, գլխավոր դատախազի, ազգային անվտանգության ծառայության տնօրենի, «Արցախի ազատամարտիկների միություն» ՀԿ նախագահի, արտակարգ իրավիճակների պետական ծառայության տնօրենի շնորհավորական ուղերձները:
Գլխավոր դատախազի հրամանով՝ ոստիկանության 3 ծառայող պարգևատրվեցին արժեքավոր նվերով և շնորհակալագրերով:
Պաշտպանության նախարարի հրամանով՝ 5 ծառայող արժանացան դրամական պարգևի:
«Արցախի ազատամարտիկների միություն» հասարակական կազմակերպության նախագահի որոշմամբ՝ ոստիկանության 2 ծառայող պարգևատրվեցին «Հայրենյաց պաշտպան» մեդալով, 1 ծառայող և ևս 2 վետերան՝ արժեքավոր նվերով:
Ազգային անվտանգության ծառայության տնօրենի հրամանով՝ 4 ծառայող պարգևատրվեցին արժեքավոր նվերով:
Արտակարգ իրավիճակների պետական ծառայության տնօրենի հրամանով՝ ոստիկանության 3 ծառայող արժանացան «Համագործակցություն հանուն փրկության» մեդալի:
Ոստիկանության պետի հրամանով՝ ՀՀ ոստիկանության պետի տեղակալ, ոստիկանության գեներալ-մայոր Գագիկ Համբարձումյանը և ՀՀ ոստիկանության բժշկական վարչության պետ, բժշկական ծառայության գնդապետ Վարդան Մովսիսյանը պարգևատրվեցին «Համագործակցության ամրապնդման համար» մեդալով, Արցախի Հանրապետության ոստիկանության պետի տեղակալներ, ոստիկանության գնդապետներ Անդրանիկ Հակոբյանը, Գագիկ Ղահրամանյանը և Բորիս Ենգիբարյանը պարգևատրվեցին «Մակարով» մոդելի ատրճանակով, իսկ 7 ծառայող՝ «ՍԿՍ» տիպի ակոսափող հրացանով: Ոստիկանության 54 ծառայող և 6 վետերան՝ «Օրենքի պատվար», 21 ծառայող՝ «Ոստիկանությունում երկարամյա ծառայության համար» մեդալով, 16 ծառայող՝ «Ոստիկանությունում գերազանց ծառայության համար» և 1 ծառայող՝ «ԼՂՀ ոստիկանության պատվավոր ծառայող» կրծքանշանով: Եվս 29 ծառայող և 7 վետերան պարգևատրվեցին արժեքավոր նվերով, 2 ծառայողներից հանվեց նախկինում նշանակված կարգապահական տույժերը: 193 ծառայող և 19 վետերան արժանացան դրամական պարգևների, իսկ 55 զոհվածների ընտանիքներին տրամադրվեց դրամական աջակցություն: