ԿԱՅՔԻ ՔԱՐՏԵԶ
ԹԵԺ ԳԻԾ
22.06.2018 21:33
Հոգատարություն ու սրտացավություն հասարակության, իսկ անհանդուրժողականություն՝ օրինախախտի հանդեպ
Սույն թվականի հունիսի 22-ին Արցախի Հանրապետության ոստիկանության պետ¸ ոստիկանության գնդապետ Իգոր Գրիգորյանը այցելեց ոստիկանության Հադրութի շրջանային բաժին և հանդիպում ունեցավ շրջբաժնի ծառայողների հետ։ Հանդիպմանը մասնակցում էին¸ Հադրութի շրջվարչակազմի ղեկավար Իվան Ավանեսյանը¸ ոստիկանության պետի 1-ին տեղակալ¸ ոստիկանության գեներալ-մայոր Անդրանիկ Հակոբյանը¸ շրջանի դատախազն ու ազգային անվտանգության ծառայության պատասխանատուն։
Սկզբից ոստիկանության կադրերի բաժնի պետ¸ ոստիկանության փոխգնդապետ Արմեն Բաղրյանը հրապարակեց ոստիկանության պետի հրամանները¸ որոնց համաձայն ոստիկանության փոխգնդապետ Արծվիկ Հայրապետյանը անձնական նախաձեռնությամբ երկարամյա ծառայության կենսաթոշակի անցնելու կապակցությամբ ազատվել է Արցախի Հանրապետության ոստիկանությունում ծառայությունից¸ իսկ ոստիկանության մայոր Արտյոմ Ավանեսյանը ազատվել է ոստիկանության տնտեսական և պաշտոնեական հանցագործությունների դեմ պայքարի բաժնի հատկապես կարևոր գործերով ավագ օպերլիազորի պաշտոնից և նշանակվել ոստիկանության Հադրութի շրջանային բաժնի պետի պաշտոնին։
Ոստիկանության պետը շնորհակալություն հայտնեց Արծվիկ Հայրապետյանին ոստիկանության համակարգում երկարամյա ծառայության և շրջանի բնակիչների անկեղծ հարգանքին արժանանալու համար և պարգևատրեց նրան հուշանվերով։ Նորանշանակ շրջբաժնի պետին մաղթելով արգասաբեր ծառայության ոստիկանության պետը համոզմունք հայտնեց¸ որ ոստիկանության մայոր Արտյոմ Ավանեսյանը ամրապնդելով համագործակցությունը ինչպես շրջվարչակազմի¸ այնպես էլ շրջանի իրավապահ կառույցների պատասխանատուների հետ¸ իր սկզբունքայնությամբ կկարողանա անհանդուրժողականություն դրսևորել օրինախախտի հանդեպ¸ իսկ հոգատար ու սրտացավ վերաբերմունքի միջոցով՝ էլ ավելի ամրապնդել հասարակության կողմից ոստիկանության հանդեպ վստահությունը։
Շրջվարչակազմի ղակավար Իվան Ավանեսյանը իր հերթին շնորհավորելով նորանշանակ շրջբաժնի պետին¸ պատրաստակամություն հայտնեց նպաստել ոստիկանության կողմից իրականացվող հասարակական անվտանգության պահպանման ուղղությամբ իրականացվող աշխատանքներին¸ այդ կերպ նպաստելով հասարակության խաղաղ կենսագործունեության պայմանների ապահովմանը:
