ԿԱՅՔԻ ՔԱՐՏԵԶ
ԹԵԺ ԳԻԾ
19.07.2019 19:31
ՀԵՏԵՎՈՂԱԿԱՆ ԱՇԽԱՏԱՆՔԻ ԵՎ ՅՈՒՐԱՔԱՆՉՅՈՒՐ ԴԵՊՔԻ ԱՆՀԱՏԱԿԱՆ ՄՈՏԵՑՄԱՄԲ ԱՐՄԱՏԱԶՐԿԵՔ ԴՐԱՆՑ ԱՌԱՋԱՑՄԱՆ ԱՂԲՅՈՒՐՆԵՐԸ
ԱՀ ոստիկանության պետը ամփոփեց ընթացիկ տարվա առաջին կիսամյակի օպերատիվ ծառայողական-գործունեության արդյունքները ոստիկանության Ստեփանակերտի քաղաքային և ոստիկանության քրեական հետախուզության վարչություններում
Սույն թվականի հուլիսի 19-ին ԱՀ ոստիկանության պետ, գեներալ-լեյտենանտ Լևոն Մնացականյանը ընթացիկ տարվա առաջին կիսամյակի օպերատիվ-ծառայողական գործունեության արդյունքներն ամփոփեց ոստիկանության Ստեփանակերտի քաղաքային և ոստիկանության քրեական հետախուզության վարչություններում:
Ընթացիկ տարվա առաջին կիսամյակում կատարված աշխատանքների վերաբերյալ հիմնական զեկույցով հանդես եկան ոստիկանության Ստեփանակերտի քաղաքային և ոստիկանության քրեական հետախուզության վարչությունների պետերը:
Ըստ ոստիկանության Ստեփանակերտի քաղաքային վարչության պետ, ոստիկանության գնդապետ Մհեր Պողոսյանի՝ 2019թ.-ի առաջին կիսամյակում Ստեփանակերտ քաղաքում բոլոր ծառայությունների գծերով գրանցվել է հանցագործության 131 դեպք՝ նախորդ տարվա 103-ի դիմաց, աճը կազմել է 28 դեպք կամ 27.2 %, որի տեսակարար կշիռը հանրապետությունում բոլոր գծերով գրանցված հանցագործությունների թվում կազմում է 28.7 % ՝ 2018թվ.-ի առաջին կիսամյակի 29.3%-ի համեմատ:
Հանցագործության կառուցվածքում նախորդ տարվա նույն ժամանակահատվածի համեմատությամբ աճել են սեփանակության (12.6%-ից 34.3%) և պետական իշխանության, ծառայության, կառավարման կարգի դեմ ուղղված հանցագործությունների (8.7%-ից 10.7%) տեսակարար կշիռները, իսկ նվազել՝ մարդու (39.8%-ից 39.7 %), հասարակական անվտանգության, հասարակական կարգի, բնակչության առողջության (37.9%-ից 14.5%) և տնտեսական գործունեության դեմ ուղղված (1%-ից 0.8 %) հանցագործությունների տեսակարար կշիռները:
Քննարկվող ժամանակահատվածում բացահայտման արդյունավետությունը նվազել է 4.8 %-ով ( 98.8%-ից 94 %), իսկ քրեական հետախուզության գծով հանցագործությունների բացահայտման արդյունավետության նվազումը կազմել է 8.8 % (97.3%-ից 88.5 %):
Համապատասխան զեկույցներով հանդես եկան նաև ոստիկանության Ստեփանակերտի քաղաքային վարչության առանցքային ստորաբաժանումների պատասխանատուները:
Ոստիկանության պետն իր խորին մտահոգություններն արտահայտելով բոլոր հանցագործությունների՝ այդ թվում քրեական հետախուզության գծով գրանցված հանցագործությունների աճի հանգամանքով, պահանջեց անհապաղ միջոցներ ձեռնարկել ինչպես դրանց կանխարգելման, այնպես էլ բացահայտման ուղղություններում:
-Հասարակական կարգի և հասարակության անվտանգության դեմ ուղղված հանցագործությունների կանխարգելումը, սեփականության բոլոր ձևերի հավասար պաշտպանությունը, նախկինում դատվածների և անչափահասների կողմից հնարավոր հանցագործությունների կանխարգելումը, մեր անմիջական պարտականությունը լինելուց բացի հասարակական պահանջ ներկայացնող հրամայականներ են: Խորքային վերլուծության արժանացրեք յուրաքանչյուր դեպք և պատահար, վեր հանեք դրանց պատճառահետևանքները: Հետևողական աշխատանքի և յուրաքանչյուր դեպքի անհատական մոտեցման միջոցով արմատազրկեք դրանց առաջացման աղբյուրները, -նշեց ոստիկանության պետը:
Գեներալ-լեյտենանտ Լևոն Մնացականյանը վերլուծության ենթարկելով յուրաքանչյուր ծառայողի արձանագրած ցուցանիշները, չափազանց կարևորեց պարեկապահակետային գումարտակի գործունեության նշանակությունը և պահանջեց նշանակվող վերակարգերի հետ իրականացնել ամենօրյա և մանրակրկիտ հրահանգավորում՝ հասարակությանը սպառնացող նույնիսկ աննշան բացասական երևույթների ժամանակին հայտաբերման և չեզոքացման համար:
ԱՀ ոստիկանության քրեական հետախուզության վարչության ընթացիկ տարվա առաջին կիսամյակի օպերատիվ-ծառայողական գործունեության արդյունքների վերաբերյալ զեկույցը ներկայացրեց վարչության պետ, ոստիկանության փոխգնդապետ Անդրեյ Մկրտչյանը, ով հատուկ կանգ առավ հանրապետության տարածքում հանցագործությունների դեմ պայքարի կազմակերպման և օպերատիվ իրավիճակի վերահսկելիության հետ կապված հիմնական ուղղություններին:
Ոստիկանության պետը վերլուծելով արձանագրած ցուցանիշները, ծառայության արդյունավետության բարձրացման ուղղությամբ հստակ և նպատակային հանձնարարականներ տվեց ոստիկանության քրեական հետախուզության վարչության պատասխանատուներին: