ԿԱՅՔԻ ՔԱՐՏԵԶ
ԹԵԺ ԳԻԾ
04.06.2016 21:54
Խորհրդակցություն՝ միտված նախաքննության որակի կատարելագործմանը
Համաձայն ԼՂՀ ոստիկանության ղեկավարության մոտ 2016թ. 1-ին կիսամյակում անցկացվելիք օպերատիվ խորհրդակցությունների պլանի՝ սույն թվականի հունիսի 4-ին ԼՂՀ ոստիկանության պետի առաջին տեղակալ, ոստիկանության գնդապետ Անդրանիկ Հակոբյանը օպերատիվ խորհրդակցություն անցկացրեց ԼՂՀ ոստիկանության քննչական վարչության քննիչների և տարածքային ստորաբաժանումների հետաքննիչների հետ։ Խորհրդակցության օրակարգը նվիրված էր «Կյանքի և առողջության դեմ ուղղված հանցագործությունների դեպքերով հարուցված քրեական գործերի նախաքննությանը», որի վերաբերյալ զեկույցը ներկայացրեց ոստիկանության քննչական վարչության պետ, ոստիկանության փոխգնդապետ Իգոր Գրիգորյանը։
Հիմնական զեկուցողը ներկայացրեց ԼՂՀ քրեական օրենսգրքի հատուկ մասի նորմերին համապատասխան կյանքի և առողջության դեմ ուղղված հանցագործությունների բնորոշումը և այդպիսի հանցագործությունների նախաքննության առանձնահատկությունները, ինչպես նաև վարույթում գտնվող քրեական գործերի ամփոփ նկարագրությունն ու քննության ընթացքը։
Ոստիկանության պետի տեղակալը, առանձին-առանձին վերլուծության ենթարկելով կյանքի և առողջության դեմ ուղղված հանցագործությունները, կոնկրետ ուղղություններով հանձնարարականներ տվեց քննիչներին։
Որպես էական ձեռքբերում՝ կարևորելով քրեական գործերի նախաքննությունը օրենքով սահմանված ժամկետներում ավարտելու հանգամանքը, ոստիկանության պետի առաջին տեղակալը ներկաների ուշադրությունը հրավիրեց նախաքննության որակի կատարելագործման, օբյեկտիվ և բազմակողմանի քննություն ապահովելու անհրաժեշտությանը։