ԿԱՅՔԻ ՔԱՐՏԵԶ
ԹԵԺ ԳԻԾ
14.03.2016 12:21
Խիստ հանձնարարականներ՝ ԼՂՀ ոստիկանության պետի կողմից
Սույն թվականի մարտի 12-ին ԼՂՀ ոստիկանության պետ, գեներալ-մայոր Կամո Աղաջանյանը խորհրդակցություն անցկացրեց ԼՂՀ ոստիկանության կենտրոնական ապարատի ծառայությունների և տարածքային ստորաբաժանումների պատասխանատուների հետ։
ԼՂՀ ոստիկանության պետը հատուկ կանգ առավ հանցագործությունների կանխարգելման և բացահայտման արդյունավետության բարձրացման անհրաժեշտությանը։
Գեներալ-մայոր Կամո Աղաջանյանը պահանջեց հանցագործությունների կանխարգելման գործում եռապատկել ջանքերը՝ հանցավոր հակումներ ունեցող անձանց նկատմամբ հսկողությունը ուժեղացնելու, իսկ արդեն կատարված և չբացահայտված յուրաքանչյուր հանցագործության վերաբերյալ մշակել համապատասխան գործողությունների պլան և միջոցներ ձեռնարկել դրանց հեղինակներին անհապաղ հայտնաբերելու ուղղությամբ։
Ոստիկանության պետն իր մտահոգություններն արտահայտեց նաև անչափահասների նկատմամբ իրականացվող պրոֆիլակտիկ աշխատանքների առթիվ, խստագույնս հանձնարարելով ակտիվացնել միջոցառումները հասարակության կրտսեր խավին ոչ միայն իրավական, այլ նաև բարոյահոգեբանական ճիշտ արժեհամակարգով դաստիարակելու և մեր հայկական ավանդույթներով նրանց ոգեշնչելու ու ոգեկոչելու առումով՝ հակառակ դեպքում խոստանալով իրենց գործառութային պարտականությունները կատարելու մեջ թերացած ոստիկանության ծառայողներին ենթարկել կարգապահական խիստ պատասխանատվության: