ԿԱՅՔԻ ՔԱՐՏԵԶ
ԹԵԺ ԳԻԾ
31.08.2016 09:58
ԼՂՀ ոստիկանության պետի հրամանով տոնական օրերին ոստիկանության անձնակազմը կանցնի ուժեղացված ծառայության
Նոր ուսումնական տարվա մեկնարկի և անկախության տոնի առթիվ ԼՂՀ ոստիկանության պետի և ոստիկանության ողջ անձնակազմի անունից ջերմագին շնորհավորանքներ հղելով մեր ժողովրդին՝ հիշեցնում ենք, որ սեպտեմբերի 1-ից մինչև սեպտեմբերի 10-ն ընկած ժամանակահատվածում հանրապետությունում կազմակերպվելու է «Ուշադրություն երեխաներ են» կարգախոսով անվտանգ երթևեկության տասնօրյակ, որի ընթացքում ճանապարհային ոստիկանության վերակարգերն ավելի կմոտեցվեն դպրոցներին և դպրոցամերձ խաչմերուկներին։ Ճանապարհային ոստիկանության ծառայողները կայցելեն դպրոցներ և երթևեկության կանոնների վերաբերյալ համապատասխան պրոֆիլակտիկ դասախոսություններով հանդես կգան աշակերտների շրջանում։
Հիշեցնում ենք, որ տասնօրյակի ընթացքում ճանապարհային ոստիկանությունը ցուցաբերելու է առավել խստություն կարգազանց և անուշադիր վարորդների նկատմամբ։
Տոնական միջոցառումների ընթացքում պատշաճ հասարակական կարգի ապահովման նպատակով ԼՂՀ ոստիկանության պետի հրամանով ոստիկանության ողջ անձնակազմը կանցնի ուժեղացված ծառայության։
Կոչ ենք անում ցուցաբերել ողջախոհություն և ըմբռնումով մոտենալ ոստիկանության ծառայողների օրինական պահանջներին։