ԿԱՅՔԻ ՔԱՐՏԵԶ
ԹԵԺ ԳԻԾ
19.06.2014 22:11
ԼՂՀ ոստիկանության պետի կողմից առողջապահության նախարարության մի շարք բուժաշխատողներ պարգևատրվեցին մեդալով
Բժիշկն ու ոստիկանն ունեն մի ընդհանրություն. երկուսին էլ մարդը վստահում է իր կյանքն ու առողջությունը, ու եթե առաջինը պայքարում է վիրահատական սեղանին հայտնվածին փրկելու համար, ապա երկրորդը պարտավոր է ապահովել այդ նույն քաղաքացու անվտանգությունը հանցավոր և հակաիրավական ոտնձգություններից:
Սույն թվականի հունիսի 19-ին ԼՂՀ ոստիկանության պետ, գեներալ-մայոր Կամո Աղաջանյանը հյուրընկալվել էր ԼՂՀ առողջապահության նախարարությունում:
ԼՂՀ առողջապահության նախարար Հարություն Քուշկյանին և առողջապահության նախարարության բոլոր աշխատողներին շնորհավորելով նախանշված բուժաշխատողի օրվա կապակցությամբ` ԼՂՀ ոստիկանության պետը հույս հայտնեց, որ ոստիկանության և առողջապահության նախարարության միջև համագործակցությունն էլ ավելի գործնական հարթություն կտեղափոխվի և կծառայի ի շահ և ի բարօրություն մեր ժողովրդի:
Այնուհետև ԼՂՀ ոստիկանության պետի տեղեկալ-շտաբի պետ, ոստիկանության գնդապետ Բորիս Ենգիբարյանը հրապարակեց ԼՂՀ ոստիկանության պետի հրամանները, որոնց համաձայն Լեռնային Ղարաբաղի Հանրապետության ոստիկանության և Լեռնային Ղարաբաղի Հանրապետության առողջապահության նախարարության միջև սերտ համագործակցության համար, ինչպես նաև ի նշանավորումն բուժաշխատողի օրվա Լեռնային Ղարաբաղի Հանրապետության առողջապահության նախարար Հարություն Մաքսիմի Քուշկյանը և առողջապահության նախարարության մի շարք բուժաշխատողներ պարգևատրվեցին «Համագործակցության ամրապնդման համար» մեդալով: