ԿԱՅՔԻ ՔԱՐՏԵԶ
ԹԵԺ ԳԻԾ
24.05.2016 20:46
ԼՂՀ ոստիկանության պետը ամփոփեց ոստիկանության 2016թ. 1-ին եռամսյակի օպերատիվ-ծառայողական գործունեության արդյունքները
Սույն թվականի մայիսի 24-ին ԼՂՀ ոստիկանությունում կայացած խորհրդակցությունը նվիրված էր ԼՂՀ ոստիկանության ընթացիկ տարվա 1-ին եռամսյակի օպերատիվ-ծառայողական գործունեության արդյունքների ամփոփմանը։
Խորհրդակցությունը վարում էր ԼՂՀ ոստիկանության պետ, գեներալ-մայոր Կամո Աղաջանյանը։
Ներկա էին ոստիկանության պետի տեղակալները, կենտրոնական ապարատի ծառայությունների, ճանապարհային ոստիկանության, քրեակատարողական և պետական պահպանության վարչությունների, ինչպես նաև ոստիկանության տարածքային ստորաբաժանումների պետերը։
2016թ. 1-ին եռամսյակում հանրապետությունում գրանցվել է 203 հանցագործություն՝ 2015թ. նույն ժամանակահատվածի 110-ի դիմաց։ Չնայած հանցագործությունների թիվը աճել է 110-ով, սակայն հարկ է նշել, որ այն հիմնականում պայմանավորված է 2016թ. 1-ին եռամսյակում լատենտային բնույթ կրող հանցագործություններից՝ թմրամիջոցների, զենք և ռազմամթերքի ապօրինի շրջանառության դեպքերի հայտնաբերման և բացահայտման ակտիվ աշխատանքներով, ինչպես նաև սույն թվականի հունվարի 1-ից դիմողի բողոքի բացակայության և տուժողը կասկածյալի կամ մեղադրյալի հետ հաշտվելու (ԼՂՀ ՔԴՕ հոդ. 35 մ. 1 կ. 4 և 5) հիմքերով կարճված քրեական գործերով և մերժված նյութերով հանցագործությունների հաշվառման հանգամանքներով։
Հաշվետու եռամսյակում 8 անչափահասի կողմից կատարվել է 10 գողության դեպք:
Հանրապետությունում հանցագործությունների կտրուկ աճի պարագայում բարելավվել է նաև բոլոր ուղղություններով դրանց բացահայտման արդյունավետությունը։
Հաշվետու եռամսյակում գրանցված հանցագործությունների բացահայտման տոկոսում հաշվառվող բոլոր հանցատեսակներով ապահովել է 100%-անոց բացահայտում։
2016թ. 1-ին եռամսյակում, նախորդ տարվա նույն ժամանակահատվածի համեմատ, 3 դեպքով (14-ից 11) նվազել են ճանապարհատրանսպորտային պատահարները, 1-ով՝ (3-ից 2) զոհերի և 8-ով՝ (20-ից 12) վիրավորների թիվը։
ԼՂՀ ոստիկանության պետը, ձեռնպահ մնալով եռամսյակի արդյունքներով գնահատականներ տալուց, մի շարք ուղղություններով նպատակային հանձնարարականներ ուղղեց ոստիկանության առանցքային ծառայությունների և տարածքային ստորաբաժանումների պատասխանատուներին։
«Չնայած հանցագործությունների աճը հիմնականում պայմանավորված է օրենսդրության փոփոխությամբ և լատենտային բնույթ կրող հանցագործությունների հայտնաբերման հանգամանքներով, սակայն, այդուհանդերձ, կան որոշակի ուղղություններ, որտեղ անհրաժեշտ են բեկումնային փոփոխություններ մտցնել: Առաջին հերթին բնակարանային գողությունների 100 տոկոսանոց բացահայտման հրամայականն է։ Բացի այդ, անհրաժեշտ է ուժեղացնել հանցագործությունների կանխարգելման ուղղությամբ իրականացվող աշխատանքները, իսկ դրանք նախականխելու լավագույն միջոցը պրոֆիլակտիկ աշխատանքների ակտիվացումն է։ Դուք պարտավոր եք հայտնաբերել հակաօրինական արարք կատարելու հակումներ ունեցող անձանց շրջանակը և անհապաղ միջոցներ ձեռնարկել նրանց գործողությունները կանխելու և հնարավոր հանցագործության նպաստող պայմաններն ու պատճառները վերացնելու ուղղությամբ»։
Ոստիկանության պետը կարևորեց նաև անչափահասների շրջանում իրականացվող աշխատանքները և անդրադառնալով հանրապետությունում նախանշված «Վերջին զանգի» հանդիսակատարությանը ու դրան հաջորդող միջոցառումներին` համապատասխան ծառայությունների պատասխանատուներին, մասնավորապես ճանապարհային ոստիկանությանը հանձնարարեց ուժեղացված ծառայության միջոցով իսպառ բացառել անչափահասների կողմից իրավախախտումների՝ այդ թվում առանց վարորդական իրավունքի տրանսպորտային միջոցները վարելու հնարավոր դեպքերը։
2016 թվականի 1-ին եռամսյակի օպերատիվ-ծառայողական գործունեության արդյունքների վերաբերյալ համառոտ տեղեկանքը կզետեղվի կայքի «Վիճակագրություն» բաժնի «Եռամսյակ» ենթաբաժնում: