ԿԱՅՔԻ ՔԱՐՏԵԶ
ԹԵԺ ԳԻԾ
23.10.2015 16:16
ԼՂՀ ոստիկանության պետը ամփոփեց ոստիկանության 2015թ. 9 ամիսների օպերատիվ-ծառայողական գործունեության արդյունքները
Սույն թվականի հոկտեմբերի 22-ին ԼՂՀ ոստիկանությունում կայացած խորհրդակցությունը նվիրված էր ԼՂՀ ոստիկանության 2015թ. 9 ամիսների օպերատիվ-ծառայողական գործունեության արդյունքների ամփոփմանը:
Խորհրդակցությունը վարում էր ԼՂՀ ոստիկանության պետ, գեներալ-մայոր Կամո Աղաջանյանը:
Մասնակցում էին կենտրոնական ապարատի և ոստիկանության տարածքային ստորաբաժանումների, ինչպես նաև ճանապարհային ոստիկանության, քրեակատարողական և պետական պահպանության վարչությունների ղեկավարները:
ԼՂՀ ոստիկանության օպերատիվ-ծառայողական գործունեության ընդհանուր գնահատականը թողնելով տարվա արդյունքների ամփոփմանը՝ ԼՂՀ ոստիկանության պետ, գեներալ-մայոր Կամո Աղաջանյանը, այնուամենայնիվ, իր դժգոհությունը արտահայտեց ծառայության մեջ տեղ գտած մի շարք ուղղություններից:
ԼՂՀ ոստիկանության պետը, անձամբ հրապարակելով և մանրակրկիտ վերլուծելով գրանցած հիմնական ցուցանիշները՝ հատկապես հանցագործությունների և մասնավորապես բնակարանային գողությունների բացահայտման ուղղություններում, միջին հանրապետականից ցածր ցուցանիշներ արձանագրած ոստիկանության Ստեփանակերտի քաղվարչության, Մարտակերտի, Շահումյանի և Քաշաթաղի շրջբաժինների պատասխանատուներին պահանջեց բացատրություններ դրանց վերաբերյալ:
«Արցախում անբացահայտ հանցագործություններ չպիտի լինեն: Մենք ի զորու ենք հասնել դրան, հասնել այն կատարելության, որպեսզի մեր համերկրացիները չկողպված դռներով հանգստանան իրենց բնակարաններում՝ մտավախություններ չունենալով ոչ միայն իրենց կյանքի և առողջության, այլև սեփականության ապահովման հարցերում, իսկ դրա համար մենք պարտավոր ենք ամբողջությամբ և անխտիր մաքրել հասարակությունը ու հանցագործություն կատարողին տեղավորել իր համար նախատեսված վայրում», - նշեց ոստիկանության պետը:
Գեներալ-մայոր Կամո Աղաջանյանը խորհրդակցության մասնակիցների ուշադրությունը սևեռեց անչափահասների, ինչպես նաև նախկինում դատվածների կողմից հանցագործությունների կանխարգելման, թմրամիջոցների ապօրինի շրջանառության դեպքերի և ապօրինի պահվող զենք, զինամթերքի հայտնաբերման ուղղությամբ տարվող աշխատանքներին՝ հանձնարարելով դրանց հետ մեկտեղ խստագույնս պահպանել հանցագործությունների գրանցման կարգապահությունը և բացարձակապես ձերբազատվել հանցագործությունները թաքցնելու արատավոր երևույթից:
2015 թվականի 9 ամիսների օպերատիվ-ծառայողական գործունեության արդյունքների վերաբերյալ համառոտ տեղեկանքը զետեղված է կայքի «Վիճակագրություն» բաժնի «Ինը ամիսներ» ենթաբաժնում: