ԿԱՅՔԻ ՔԱՐՏԵԶ
ԹԵԺ ԳԻԾ
12.06.2018 17:11
Արցախի Հանրապետության ոստիկանության պետի հանդիպումը ճանապարհային ոստիկանության անձնակազմի հետ
Սույն թվականի հունիսի 11-ին Արցախի Հանրապետության ոստիկանության պետ¸ ոստիկանության գնդապետ Իգոր Գրիգորյանը ճանաչողական հանդիպում ունեցավ Արցախի Հանրապետության ոստիկանության ճանապարհային ոստիկանության անձնակազմի հետ։
Նախ¸ երկարամյա ծառայության համար շնորհակալություն հայտնելով ոստիկանության արդեն պաշտոնաթող գնդապետ Գեորգի Ղարամյանին և անձնակազմին ներկայացնելով ճանապարհային ոստիկանության հաշվառման–քննական բաժնի նորանշանակ պետ¸ ոստիկանության մայոր Դավիթ Սարգսյանին¸ ոստիկանության պետը համոզմունք հայտնեց¸ որ այդ պատասխանատու պաշտոնում նա կարդարացնի իր հանդեպ ցուցաբերած վստահությունը։
Այնուհետև¸ ոստիկանության գնդապետ Իգոր Գրիգորյանը անվտանգ երթևեկության ապահովման հայեցակարգում խիստ կարևորելով ճանապարհային ոստիկանության գործունեությունը ամբողջովին թափանցիկ հարթություն տեղափոխելու հրամայականը¸ պահանջեց լինել անկողմնակալ ու օրենքի տառի և ոգու խստիվ պահպանմամբ միայն կազմակերպել ծառայությունը։
«Գեներալ-մայոր Կամո Աղաջանյանի ջանքերով էական բարեփոխումների է ենթարկվել ոստիկանությունը¸ այդ թվում ճանապարհային ոստիկանությունը։ Մենք պարտավոր ենք այդ բարեփոխումները հասցնել իր վերջնական հանգրվանին¸ ամրապնդել արդարության և օրենքի առաջ բոլորի հավասարության սկզբունքները¸ բարձրացնել հասարակության իրավագիտակցությունը և պաշտպանել քաղաքացու իրավունքներն ու ազատությունները¸ սա ընդունեք որպես ուղեցույց ու ամեն ծառայողական օր սկսեք դիմացինին հարգելու և նրա օրինական պաշտպանն ու անվտանգության երաշխավորը լինելու առաքելությամբ»¸ նշեց ոստիկանության պետը։