ԿԱՅՔԻ ՔԱՐՏԵԶ
ԹԵԺ ԳԻԾ
30.11.2018 08:38
Արցախի Հանրապետության ոստիկանության պետ, ոստիկանության գնդապետ Իգոր Գրիգորյանի շնորհավորական ուղերձը ոստիկանության ծառայողի մասնագիտական օրվա առթիվ
Արցախի Հանրապետության ոստիկանության հարգելի ծառայողներ և վետերաններ, սրտանց շնորհավորում եմ ձեզ մասնագիտական տոնի՝ ոստիկանության օրվա կապակցությամբ:
Ձեզ է վստահված քաղաքացիների անվտանգության և իրավունքների պաշտպանության, երկրում հասարակական կարգի և օրինապահության ամրապնդման կարևորագույն գործառույթը, որը դուք արժանապատվորեն եք իրականացնում։
Արցախի Հանրապետության ոստիկանությունում իրականացվող բարեփոխումները նպատակ են հետապնդում ապահովել լիարժեք հասարակական անվտանգության մթնոլորտ, ամբողջովին պարզեցնել հասարակությանը մատուցվող ծառայությունները և համակարգի թափանցիկ գործելաոճի շնորհիվ ամրապնդել հասարակություն-ոստիկանություն կապը։
Հարգելի գործընկերներ
Արցախի Հանրապետության ոստիկանությունը այսօր էլ շարունակելով անցյալի լավագույն ավանդույթները՝ ձևավորում է մասնագիտական և բարոյական բարձր արժեհամակարգով օժտված ոստիկան և արդի պահանջներով պայմանավորված ոստիկանություն։
Եվս մեկ անգամ շնորհավորելով Արցախի Հանրապետության ոստիկանության համակարգի բոլոր ծառայողներին, վետերաններին, հաշմանդամներին, Արցախյան ազատամարտում և ծառայողական պարտականությունները կատարելու ընթացքում զոհված մեր գործընկերների ընտանիքներին, մաղթում եմ անձնական երջանկություն, անսպառ ուժ և նպատակների իրականացում։
Հավատարիմ մնանք մեր կոչմանը և թող Աստված միշտ զորավիգ լինի Արցախ աշխարհին։